இந்திய கிரிக்கெட் அணியின் முன்னாள் கேப்டன் மகேந்திர சிங் தோனி இன்று தனது 39வது பிறந்தநாளைக் கொண்டாடுகிறார். அவருக்கு மும்பை காவல்துறையினர் ட்விட்டரில் வாழ்த்து தெரிவித்துள்ளனர். அதில், `MSD' என்பதற்கு விரிவாக்கமாக `Maintain Social Distancing' என்று எழுதப்பட்டுள்ளது. அதாவது அவரது பெயரைப் பயன்படுத்தி கொரோனா தொடர்பான விழிப்புணர்வையும் ஏற்படுத்தியுள்ளனர்.

இந்தியாவில் வைரஸ் பாதிப்பு ஒரு லட்சம் என்ற எண்ணிக்கையை அடைவதற்கு சுமார் 110 நாள்கள் ஆனது. ஆனால், இந்தப் பாதிப்பு எண்ணிக்கை ஏழு மடங்காக அதிகரிக்க அதாவது 7 லட்சம் பாதிப்புகளை அடைய வெறும் 49 நாள்கள் மட்டுமே ஆனது எனத் தகவல்கள் தெரிவிக்கின்றன. 

கோவாவில் உள்ள மருத்துவமனை ஒன்றில் கொரோனா நோயாளிகளுக்கு சிகிச்சை அளிக்கும் மருத்துவர்கள் குழுவை மருத்துவர் எட்வின் வழிநடத்திக்கொண்டிருக்கிறார். கொரோனா பாதிப்பில் இருந்து மீண்ட சுமார் 190 நபர்களை இவர் கட்டியணைத்து அன்புடன் வீட்டுக்கு அனுப்பி வைத்துள்ளார். பாதிப்பில் இருந்து குணமடைந்தவர்களை மக்கள் நிராகரிக்கக்கூடாது என்பதை எடுத்துரைக்க அவர் இவ்வாறு செய்கிறார்.

பிரண்ட்ஸ் ஆஃப் போலீஸ் அமைப்பை காவல்துறை பயன்படுத்திக்கொள்வதற்கு சட்ட ரீதியான அனுமதி உள்ளதா, என்று தமிழ்நாடு மாநில மனித உரிமைகள் ஆணையம் தமிழக அரசுக்கு கேள்வி எழுப்பியுள்ளது. பிரண்ட்ஸ் ஆஃப் போலீஸ் அமைப்புக்கு நிரந்தரத் தடை விதிப்பது குறித்து நான்கு வாரத்துக்குள் பதிலளிக்குமாறு உள்துறை செயலாளர், டி.ஜி.பி ஆகியோருக்கு ஆணையம் நோட்டீஸ் அனுப்பியுள்ளது. 

நெல்லை மனோன்மணியம் சுந்தரனார் பல்கலைக்கழகத்தின் பணியாளர் ஒருவருக்கு கொரோனா தொற்று பாதிப்பு உறுதியாகியுள்ளது. அதனால், பாதுகாப்பு கருதி அடுத்த 3 தினங்களுக்கு பல்கலைக்கழகம் முழுமையாக மூடப்படுவதாக அறிவிக்கப்பட்டுள்ளது. 

கோவை ஒருங்கிணைந்த நீதிமன்ற நீதிபதி ஒருவருக்கு கொரோனோ உறுதி செய்யப்பட்டது. இதையடுத்து, நீதிபதி பணியாற்றிய 2 விரைவு நீதிமன்றமங்கள் மூடப்பட்டன. அதேபோல, போத்தனூர் காவல்நிலையத்தைச் சேர்ந்த தலைமை பெண் காவலர் ஒருவருக்கும் கொரோனா உறுதியாகியுள்ளது. இதனால், போத்தனூர் காவல்நிலையம் மூடப்பட்டு, அருகில் உள்ள மண்டபத்தில் செயல்பட்டு வருகிறது. 

சிவகங்கை மாவட்ட காவல் கண்காணிப்பாளருக்கு கொரோனா தொற்று உறுதி செய்யப்பட்டுள்ளது. எஸ்.பி.க்கு கொரோனா உறுதியானதை அடுத்து வீட்டிலேயே அவருக்கு சிகிச்சை அளிக்கப்பட்டு வருகிறது. மாவட்டத்தில் கடந்த 3 நாட்களில் 250 பேருக்கு தொற்று உறுதியாகி உள்ளது. நேற்று வரை அங்கு 564 பேருக்கு கொரோனா தொற்று உறுதி செய்யப்பட்டுள்ளது.

அ.தி.மு.கவின் செய்தித் தொடர்பாளர் கோவை செல்வராஜ், ''தமிழகத்தை மத்திய அரசு தொடர்ந்து வஞ்சித்து வருகிறது. மத்திய அரசு சரியான நேரத்தில் நடவடிக்கை எடுத்திருந்தால், இந்நேரம் வெளிநாடுகளில் தவிக்கும் தமிழர்கள் அனைவரையும் அழைத்து வந்திருக்கலாம். மத்திய அரசு தங்களின் நடவடிக்கைகளை இனியாவது வேகப்படுத்த வேண்டும்'' என கருத்துத் தெரிவித்துள்ளார்.

தமிழகத்தில், இன்று மட்டும் 3,616 பேருக்கு கொரோனா தொற்று உறுதி செய்யப்பட்டுள்ளதாக சுகாதாரத்துறை தெரிவித்துள்ளது. இதையடுத்து, தமிழகத்தில் கொரோனா நோய்த் தொற்றால் பாதிக்கப்பட்டவர்களின் எண்ணிக்கை 1,18,594 ஆக உயர்ந்துள்ளது. பலி எண்ணிக்கை 65 ஆக உள்ள நிலையில், தமிழகத்தில் கொரோனா நோய்த் தொற்றால் இறந்தவர்களின் எண்ணிக்கை 1, 636 ஆக அதிகரித்துள்ளது. 

மேற்கு வங்கத்தில் தொடர் கொலைகள் மற்றும் பாலியல் வன்கொடுமை வழக்கில் கைதான கம்ருஸ்கன் சர்க்காருக்கு மரண தண்டனை விதிக்கப்பட்டுள்ளது. இதுவரை 9 பெண்களை கொலை செய்துள்ளார். அதில், 2 பெண்களை பாலியல் வன்கொடுமை செய்துள்ளார். இதுதொடர்பான வழக்கில் அவருக்கு கிழக்கு பரத்வான் மாவட்ட நீதிமன்றம் மரண தண்டனை விதித்துள்ளது.

கொரோனா பிரச்னை ஆரம்பித்ததில் இருந்து பல செலிப்ரிட்டிகளும் விழிப்புணர்வு டிப்ஸ் பகிர்ந்து கொண்டிருக்க, நடிகை சிம்ரனும் அப்படியொன்றைத் தன் இன்ஸ்டாவில் வழங்கியிருக்கிறார். "வெந்நீரில் மஞ்சள்தூள் போட்டு ஆவி பிடித்தால், ஜலதோஷம் தணியும். மூக்கடைப்பும் சரியாகும். கூடுதலாக, முகமும் அழுக்கெல்லாம் நீங்கிப் பளிச்சிடும்" என்றிருக்கிறார். 

காவிரி உரிமை மீட்புக் குழு , `தமிழ்நாடு அரசு, மேட்டூர் அணையையும் குறுவை சாகுபடியையும் நினைவில் வைத்திருக்கிறதா என்ற ஐயம் ஏற்படுகிறது. தமிழக முதலமைச்சர் உடனடியாக காவிரி மேலாண்மை ஆணையத்துடனும், கர்நாடக அரசிடமும் தொடர்பு கொண்டு, சட்டப்படி ஜூன் – ஜூலைக்குத் திறக்க வேண்டிய தண்ணீரைப் பெற்று குறுவை சாகுபடியைக் காப்பாற்ற வேண்டும்'' என கோரிக்கை விடுத்துள்ளது.

தோனிக்கு,  மனைவி சாக்‌ஷி தன் இன்ஸ்டா பக்கத்தில் அழகான பிறந்தநாள் வாழ்த்து ஒன்றைப் பதிவிட்டுள்ளார். அதில், `நீங்கள் பிறந்து இன்றுடன் மற்றொரு வருடம் முடிந்துவிட்டது. இனி நீங்கள் மேலும் கொஞ்சம் புத்திசாலியாகவும், இனிமையாகவும் மாறுங்கள். எந்த விஷயத்தாலும் அசைக்க முடியாத ஒரு மனிதர் நீங்கள். வாழ்க்கையின் மற்றோர் ஆண்டைக் கொண்டாடுவோம். பிறந்தநாள் வாழ்த்துகள், கணவரே.." என்று தன் காதலைப் பகிர்ந்துள்ளார்.

சித்த மருத்துவத்தின் அடிப்படையில் தயாரிக்கப்பட்டிருக்கும் `இம்ப்ரோ' எனும் மருத்துவப் பொடியை மத்திய அமைச்சகம் பரிசோதித்து, அது குறித்த அறிக்கையை ஆகஸ்ட் 3 -ம் தேதி நீதிமன்றத்தில் தாக்கல் செய்ய சென்னை உயர்நீதிமன்ற மதுரைக்கிளை உத்தரவு பிறப்பித்துள்ளது. 

மதுரை மத்திய தொகுதி முன்னாள் எம்.எல்.ஏவும் விஜயகாந்த்தின் நண்பருமான சுந்தரராஜன் உடல்நலம் குன்றி அரசு மருத்துவமனையில் சிகிச்சை பெற்றுவந்த நிலையில் சிகிச்சை பலனின்றி உயிரிழந்தார். இவரது இறப்புக்கு பல்வேறு அரசியல் கட்சித் தலைவர்களும் இரங்கல் தெரிவித்து வருகின்றனர்.

புதுச்சேரியில் கொரோனா தொற்று அதிகரித்து வருகிறது. கட்டுப்படுத்தப்பட்ட பகுதிகளில் இருந்து மக்கள் இயல்பாக வெளியில் வந்து உலவுவதைக் கண்டுபிடிக்க டெலிகாம் நிறுவனங்களுடன் இணைந்து புதிய திட்டம் வகுக்கப்பட்டுள்ளது. அப்படி வருபவர்களைக் கண்காணிக்க,சைபர் கிரைம் செல்லில் இன்று முதல் `கோவிட் வார் ரூம்' செயல்படத் தொடங்கியுள்ளது. 

தமிழகத்தில் 11 மற்றும் 12 -ம் வகுப்பிற்கான பாடங்களை ஐந்தாக குறைப்பதாக கடந்த ஆண்டு திட்டமிடப்பட்டது.தமிழக மாணவர்கள் கூடுதலாக ஒரு பாடத்தை படிப்பதால் இந்த கல்வி ஆண்டிலிருந்து ஐந்து பாடங்களை மட்டும் படித்தால் போதும் என்று தீர்மானிக்கப்பட்டது. ஆனால் பொதுமக்கள், ஆசிரியர்கள் , பெற்றோர்கள் ஆகியோரின் கோரிக்கையை ஏற்று ஆறு பாடங்களே தொடரும் என்று பள்ளிக் கல்வி துறை அறிவித்துள்ளது. 

ராஜஸ்தானில் தூய்மைப் பணியாளர்கள், கழிவுநீர் தொட்டிகளில் இறங்கி பணிசெய்யவில்லை என்பதை உறுதி செய்யுமாறு  அதிகாரிகளுக்கு அம்மாநில முதலவர் அசோக் கெலாட் உத்தரவிட்டுள்ளார். மேலும், இதுகுறித்து அவர் கூறுகையில் ,`இந்த பணிகளை எந்திரங்கள் மூலமாக தான் செய்ய வேண்டும். கழிவுநீர் தொட்டி மரணம் இனி ஒருபோதும் நிகழக்கூடாது' என்றார்.

ஆம்பூர் தொகுதியின் தி.மு.க எம்.எல்.ஏ வில்வநாதனின் செருப்பை பட்டியலின சமூக நிர்வாகி கைகளால் தூக்கி வந்த விவகாரம் பூதாகரமாக வெடித்திருக்கிறது. ‘‘செருப்பின் மதிப்பு ரூ.6,500 என்பதால்தான் சேற்றில் படாமல் பட்டியலின சமூக நிர்வாகியை கைகளால் தூக்கி வரச்சொன்னார் எம்.எல்.ஏ வில்வநாதன்’’ என்று கொந்தளிக்கத் தொடங்கியிருக்கிறார்கள் தலித் அமைப்புகளின் நிர்வாகிகள்.

கொரோனா காரணமாக பல்கலைக்கழக தேர்வுகள் தள்ளிவைக்கப்பட்டிருந்தது. இந்நிலையில் இறுதியாண்டு தேர்வு எழுதவிருக்கும் மாணவர்களுக்கு செப்டம்பர் மாத இறுதிக்குள் ஆஃப்லைன் அல்லது ஆன்லைன் மூலமாக தேர்வுகள் நடத்தப்படும் என பல்கலைக்கழக மானியக் குழு அறிக்கை விடுத்துள்ளது. இதில் கலந்து கொள்ள இயலாத மாணவர்களுக்கு மீண்டும் சிறப்புத்தேர்வுகள் நடத்தப்படும் என்றும் யு.ஜி.சி தெரிவித்துள்ளது.

இராமேஸ்வரம் மீன்பிடித் துறைமுகத்திலிருந்து நேற்று தங்கச்சிமடத்தைச் சேர்ந்த மார்க்கோபோலோ என்பவருக்கு சொந்தமான விசைப்படகில் 4 மீனவர்கள் கடலுக்கு மீன் பிடிக்கச் சென்றனர். இரவு கடலில் மீன் பிடித்துக் கொண்டிருக்கும் போது மீனவர் சுபாஷ் சந்திர போஸ் நெஞ்சுவலி காரணமாக மரணம் அடைந்தார். 

கொரோனா தொற்று தீவிரமாக இருப்பதால் திண்டுக்கல்லில் உள்ள 150க்கும் மேற்பட்ட நகைக்கடைகள் இன்று முதல் 10 நாட்களுக்கு அடைக்க நகைக்கடை உரிமையாளர்கள் சங்கம் முடிவு செய்துள்ளது. 

நீலகிரி தோட்டக்கலைத்துறை கட்டுப்பாட்டில் இயங்கிவரும் பழைமையான பழப்பண்ணைகளில் ஒன்றான குன்னூர் பழவியல் நிலையத்தில் 10 ஆண்டுகளுக்குப் பிறகு ஸ்ட்ராபெரி உற்பத்தி சாகுபடி செய்யப்படுகிறது.

திருவனந்தபுரத்தில் உள்ள ஐக்கிய அரபு நாட்டின் தூதரகத்திற்கு அனுப்பப்படுவதாக விமானத்தில் வந்த உணவு பார்சலில் 30 கிலோ தங்கம் இருப்பது கண்டுபிடிக்கப்பட்டுள்ளது. இந்த சம்பவம் தொடர்பாக ஸ்ரித் என்பவர் கைது செய்யப்பட்டுள்ள நிலையில், கேரள ஐ.டி துறை ஊழியரான ஸ்வபானா சுரேஷ் என்பவரையும் சுங்கத்துறையினர் தேடி வருகின்றனர். 

திண்டுக்கல் மாவட்டம், வத்தலகுண்டில் மனவளர்ச்சி குன்றிய சிறுமிக்கு பாலியல் தொந்தரவு கொடுத்த தற்காலிக தூய்மைப் பணியாளர் ஒருவர் போக்சோ சட்டத்தில் கைது செய்யப்பட்டுள்ளார். 

TamilFlashNews.com
Open App